وفاقی حکومت نے اسلام آباد انٹرنیشنل ایئرپورٹ کے آپریشنز متحدہ عرب امارات کے حوالے کرنے کا فیصلہ کر لیا۔ یہ اقدام پاکستان کے نقصان میں جانے والے سرکاری اثاثوں کی کارکردگی بہتر بنانے اور غیر ملکی شراکت داروں کو متوجہ کرنے کی پالیسی کا حصہ ہے۔
کابینہ کمیٹی برائے بین الحکومتی کمرشل ٹرانزیکشنز کے اجلاس میں یہ فیصلہ کیا گیا، جس کی صدارت ڈپٹی وزیراعظم اسحاق ڈار نے کی۔ ایئرپورٹ کا انتظام جی ٹو جی فریم ورک کے تحت دیا جائے گا۔
حکام کے مطابق وزیرِاعظم کے مشیر برائے نجکاری مذاکراتی کمیٹی کی قیادت کریں گے، جس میں دفاع، خزانہ اور قانون کی وزارتوں کا بھی کردار ہوگا۔
اسلام آباد ایئرپورٹ 2018 میں افتتاح کے بعد سے مالی اور انتظامی مشکلات کا شکار رہا ہے۔ حکومت کا کہنا ہے کہ غیر ملکی شراکت داروں کی شمولیت سے معیارِ خدمت اور سرمایہ کاروں کا اعتماد بہتر ہوگا۔
