کراچی – اورنگی ٹاؤن میں پولیس مقابلے میں ہلاک ہونے والا ملزم بچوں کے سامنے باپ کے قتل میں ملوث نکلا۔
تفصیلات کے مطابق پاکستان بازار تھانے کی حدود میں سیکٹر ساڑھے گیارہ دھابیجی موڑ کے قریب پولیس اور مسلح ڈاکوؤں کے درمیان فائرنگ کے تبادلے میں ہلاک ہونے والے ملزم کی شناخت نور حسین عرف نونو ولد ناصر حسین کے نام سے ہوئی، جو 28 ستمبر کو محمد مصطفیٰ کالونی میں مزاحمت پر شہری سجاد کے قتل میں ملوث تھا۔
ڈی آئی جی ویسٹ عرفان علی بلوچ کے مطابق واردات میں شریک ملزم اور موٹر سائیکل چلانے والا محمد بلال تین روز قبل اقبال مارکیٹ پولیس کے ہاتھوں گرفتار کیا جاچکا تھا۔ پولیس کے مطابق سوشل میڈیا پر وائرل سی سی ٹی وی فوٹیج میں دونوں ملزمان کو واردات کرتے اور فرار ہوتے واضح طور پر دیکھا گیا۔
گرفتار ملزم سے حاصل معلومات اور فوٹیج کی مدد سے پولیس نے مرکزی ملزم کی گرفتاری کے لیے کارروائی کی تو اس نے فائرنگ شروع کردی، جس پر جوابی کارروائی میں نور حسین عرف نونو زخمی ہوا اور بعد ازاں دم توڑ گیا۔
پولیس نے جائے وقوعہ سے اسلحہ، گولیاں، موبائل فون اور نقدی برآمد کی۔
وزیر داخلہ سندھ ضیاء الحسن لنجار نے ڈی آئی جی ویسٹ اور ان کی ٹیم کو خراجِ تحسین پیش کرتے ہوئے کہا کہ سماج دشمن عناصر کے خلاف پولیس کی جرات مندانہ کارروائی قابلِ تعریف ہے، شہریوں کو نشانہ بنانے والے خطرناک ڈاکو کو انجام تک پہنچانا قانون کی عملداری کی بہترین مثال ہے۔
