پشاور: پشاور میں انسداد دہشت گردی کی خصوصی عدالت نے بھتہ خوری کے الزام میں گرفتار افغان مہاجر کی ضمانت منسوخ کرتے ہوئے ملزم کو جیل بھیجنے کا حکم دے دیا ہے۔
انسداد دہشت گردی عدالت کے جج فرید علیزئی نے کیس کی سماعت کی، جس کے دوران فریقین کے دلائل سننے کے بعد عدالت نے ملزم عبدالحفیظ کی ضمانت کی درخواست خارج کر دی۔پراسیکیوشن کے مطابق ملزم نے پشاور کے ایک معروف ریسٹورنٹ کے مالک سے بھتہ طلب کیا تھا۔ بتایا گیا کہ ملزم نے مختلف موبائل نمبرز کے ذریعے ریسٹورنٹ مالک سے رابطہ کیا۔
پراسیکیوشن کا کہنا ہے کہ ملزم نے خود کو کالعدم تنظیم تحریک طالبان پاکستان کا کارندہ ظاہر کیا اور بھتہ نہ دینے کی صورت میں سنگین نتائج کی دھمکیاں دیں۔
قانون نافذ کرنے والے اداروں نے ملزم کو ٹریس کرنے کے بعد گرفتار کیا۔ عدالت نے شواہد اور دلائل کی روشنی میں ضمانت کی درخواست مسترد کرتے ہوئے ملزم کو جیل بھیجنے کا حکم دے دیا۔
