تائیوان کی معروف ایئرلائن ایوا ایئر (EVA Air) کو اس وقت عوامی غصے کا سامنا کرنا پڑا جب کمپنی نے اپنی ایک فضائی میزبان کے انتقال کے بعد اُس سے چھٹی کی درخواست کے ثبوت مانگ لیے۔
34 سالہ فضائی میزبان سن (Sun) اٹلی کے شہر میلان سے تائیوان جاتے ہوئے دورانِ پرواز طبیعت خراب ہونے پر اسپتال منتقل کی گئیں، جہاں وہ 8 اکتوبر کو انتقال کر گئیں۔
حیران کن طور پر، اُن کی وفات کے چند روز بعد کمپنی نے اُن کے نمبر پر پیغام بھیجا، جس میں پوچھا گیا کہ وہ اپنی چھٹی کے کاغذات کب جمع کروائیں گی۔
اہلِ خانہ نے جواب میں سن کا ڈیتھ سرٹیفکیٹ بھیج دیا۔
کمپنی کے صدر سن چیا-منگ نے واقعے پر معذرت کرتے ہوئے کہا:
"سن کی جدائی ہمارے دلوں میں ہمیشہ ایک زخم کی طرح رہے گی۔ ہم اس واقعے کی مکمل تحقیقات کر رہے ہیں۔”
سوشل میڈیا پر لوگوں نے ایئرلائن پر عملے سے زیادہ کام لینے اور ہمدردی نہ دکھانے کا الزام عائد کیا ہے۔ حکام نے اس واقعے کی تحقیقات شروع کر دی ہیں کہ آیا سن کو بیماری کے باوجود کام پر مجبور کیا گیا۔
یہ افسوسناک واقعہ تائیوان میں کارپوریٹ ذمہ داری اور عملے کی فلاح پر نئے سوالات اٹھا رہا ہے۔
