چین کے وزیر خارجہ وانگ ای نے اسلام آباد میں فیلڈ مارشل جنرل سید عاصم منیر سے ملاقات کی، جس میں علاقائی سلامتی، انسداد دہشت گردی اور باہمی تعاون پر تفصیلی تبادلہ خیال کیا گیا۔
آئی ایس پی آر کے مطابق، دونوں رہنماؤں نے پاک-چین ’’ہم موسمی اسٹریٹیجک شراکت داری‘‘ کو مزید مستحکم کرنے اور علاقائی و عالمی سطح پر ہم آہنگی بڑھانے کے عزم کا اعادہ کیا۔ وانگ ای نے پاکستان کی خودمختاری، سلامتی اور ترقی کے لیے چین کی غیر متزلزل حمایت کو دہراتے ہوئے یقین دلایا کہ بیجنگ ہمیشہ اسلام آباد کے ساتھ کھڑا رہے گا۔ فیلڈ مارشل منیر نے چینی قیادت اور عوام کے مستقل تعاون پر اظہارِ تشکر کیا۔
ملاقات کا اختتام اس عزم کے ساتھ ہوا کہ دونوں ممالک خطے میں امن، استحکام اور خوشحالی کے فروغ کے لیے مل کر کام کریں گے۔
اس سے قبل وزیر اعظم شہباز شریف نے بھی وانگ ای سے ملاقات کی اور تجارتی، زرعی، آئی سی ٹی، معدنیات اور صنعتی شعبوں میں تعاون بڑھانے پر زور دیا۔ انہوں نے پاک-چین اقتصادی راہداری (سی پیک) خصوصاً فیز-ٹو کو پاکستان کی معاشی ترقی اور علاقائی روابط کے لیے کلیدی قرار دیا۔
وزیراعظم نے چین کے بنیادی مفادات پر پاکستان کی غیر متزلزل حمایت کا اعادہ کرتے ہوئے چینی عوام اور قیادت کا شکریہ ادا کیا۔
