کراچی — شہر قائد میں ایک اور افسوسناک حادثہ پیش آیا جہاں تیز رفتار واٹر ٹینکر نے کورنگی انڈسٹریل ایریا میں موٹرسائیکل سوار کو روند ڈالا، جس کے نتیجے میں ایک شخص موقع پر جاں بحق ہوگیا۔
پولیس کے مطابق حادثہ اس وقت پیش آیا جب واٹر ٹینکر تیز رفتاری کے باعث قابو سے باہر ہو گیا اور موٹرسائیکل سے جا ٹکرایا۔ حادثے کے فوراً بعد ٹینکر ڈرائیور موقع سے فرار ہو گیا۔
عینی شاہدین کے مطابق ٹینکر ڈرائیور نے حادثے سے قبل کئی سگنل توڑے۔ پولیس نے واقعے کا مقدمہ درج کر کے ملزم کی تلاش شروع کر دی ہے۔
علاقہ مکینوں نے بھاری گاڑیوں کی لاپرواہ ڈرائیونگ پر تشویش کا اظہار کرتے ہوئے کہا ہے کہ اگر سخت ٹریفک قوانین پر عملدرآمد نہ کیا گیا تو مزید قیمتی جانیں ضائع ہو سکتی ہیں۔
