لاہور کی فضا غیر صحت بخش، اسموگ میں اضافہ — شہریوں کو احتیاطی تدابیر اختیار کرنے کی ہدایت
لاہور میں فضائی آلودگی خطرناک حد تک بڑھ گئی ہے، جس کے باعث شہریوں کے لیے سانس لینا مشکل ہوتا جا رہا ہے۔ ماحولیاتی محکمے کے مطابق شہر کا ایئر کوالٹی انڈیکس (AQI) 170 سے تجاوز کر گیا، جو "غیر صحت بخش” درجے میں شمار ہوتا ہے۔
جمعے کی صبح شہر کے مختلف علاقوں میں اسموگ کی شدت میں اضافہ دیکھنے میں آیا، خاص طور پر گلبرگ، ڈیفنس، انارکلی، مال روڈ اور فیروزپور روڈ کے علاقے بدترین آلودگی کی زد میں ہیں۔ شہریوں نے آنکھوں میں جلن اور سانس لینے میں دشواری کی شکایات کی ہیں۔
ماہرین صحت نے شہریوں کو غیر ضروری طور پر باہر نکلنے سے گریز، ماسک کے استعمال اور زیادہ پانی پینے کی ہدایت کی ہے۔ اسکول جانے والے بچوں اور بزرگوں کو خصوصی احتیاط برتنے کا مشورہ دیا گیا ہے۔
دوسری جانب، حکومتِ پنجاب نے اسموگ پر قابو پانے کے لیے ہنگامی اقدامات شروع کر دیے ہیں۔ ان میں اینٹوں کے بھٹوں اور فیکٹریوں کی نگرانی، دھواں چھوڑنے والی گاڑیوں کے خلاف کارروائی، اور ممکنہ تعلیمی اداروں کی عارضی بندش پر غور شامل ہے۔
ماحولیاتی ماہرین کا کہنا ہے کہ اگر موسم خشک اور ہوائیں بند رہیں تو اگلے چند دنوں میں آلودگی مزید بڑھ سکتی ہے۔
