رواں سال کا سب سے بڑا سپر مون، جسے ’’بیور سپر مون‘‘ کہا جاتا ہے، آج افق پر اپنی پوری شان کے ساتھ دکھائی دے رہا ہے۔ سپر مون اس وقت بنتا ہے جب چاند زمین کے سب سے قریب ترین فاصلے پر پہنچتا ہے، جس کی وجہ سے یہ عام چاند کے مقابلے میں بڑا اور زیادہ روشن لگتا ہے۔
آج چاند زمین سے تقریباً 221,817 میل کے فاصلے پر ہے اور یہ معمول کے چاند سے 9.7 فیصد بڑا اور 16 فیصد زیادہ روشن نظر آرہا ہے۔ سپر مون کے دوران چاند کی روشنی اور بھی واضح محسوس ہوتی ہے، اور زمین سے قریب ہونے کی وجہ سے یہ منظر شوقین افراد اور فلکیات کے ماہرین کے لیے خاص دلکش بن جاتا ہے۔
یہ اس سال کا دوسرا سپر مون ہے، جبکہ اگلے سپر مون کا امکان دسمبر میں ہے۔ ماہرین کا کہنا ہے کہ صاف آسمان والے علاقوں سے اس شاندار منظر کا مشاہدہ کرنا بہترین تجربہ ہوگا، اور یہ موقع فوٹوگرافروں کے لیے بھی نایاب لمحے فراہم کرتا ہے۔
