کراچی: اسٹیٹ بینک آف پاکستان (SBP) نے محمدی ایکسچینج کمپنی (پرائیویٹ) لمیٹڈ کا غیر ملکی زرمبادلہ کا کاروبار کرنے کا لائسنس منسوخ کر دیا ہے، جس کے بعد کمپنی کو اس شعبے میں کسی بھی قسم کی سرگرمی کی اجازت نہیں رہی۔
اسٹیٹ بینک کی جانب سے جمعہ کو جاری کردہ اعلامیے کے مطابق کمپنی کی مجاز حیثیت اس کے آپریشنز کی بندش کے بعد فوری طور پر ختم کر دی گئی ہے۔
بیان میں کہا گیا ہے کہ محمدی ایکسچینج کمپنی اب کسی بھی قسم کی غیر ملکی کرنسی کی خرید و فروخت یا لین دین کرنے کی مجاز نہیں ہے۔
اسٹیٹ بینک نے عوام کو ہدایت کی ہے کہ وہ اس کمپنی کے ساتھ کسی بھی زرمبادلہ کے لین دین سے گریز کریں کیونکہ اب کمپنی کو اس شعبے میں کام کرنے کا لائسنس حاصل نہیں ہے۔
مرکزی بینک حالیہ مہینوں میں ایکسچینج کمپنیوں کی نگرانی سخت کر رہا ہے اور ان کمپنیوں کے خلاف کارروائی کر رہا ہے جو ضوابط یا اینٹی منی لانڈرنگ قوانین کی خلاف ورزی میں ملوث پائی جاتی ہیں۔
