کراچی – وفاقی تحقیقاتی ادارے (ایف آئی اے) کے کارپوریٹ کرائم سرکل نے جناح انٹرنیشنل ایئرپورٹ پر کارروائی کرتے ہوئے غیر قانونی کرنسی ایکسچینج کے الزام میں دو افراد کو گرفتار کرلیا۔
ترجمان ایف آئی اے کے مطابق، ڈی جی ایف آئی اے کی ہدایت پر حوالہ ہنڈی اور غیر قانونی کرنسی کاروبار میں ملوث عناصر کے خلاف کریک ڈاؤن جاری ہے۔
گرفتار ملزمان کی شناخت اسامہ عابد اور محمود بٹ کے ناموں سے ہوئی ہے، جنہیں ایئرپورٹ پارکنگ سے حراست میں لیا گیا۔ کارروائی کے دوران ملزمان کے قبضے سے 2 کروڑ 80 لاکھ روپے سے زائد مالیت کی ملکی و غیر ملکی کرنسی برآمد ہوئی۔
ترجمان کے مطابق، دونوں افراد بغیر لائسنس کرنسی ایکسچینج کا غیر قانونی کاروبار چلا رہے تھے۔ ان سے موبائل فونز اور دیگر اہم شواہد بھی تحویل میں لے لیے گئے ہیں۔ ملزمان برآمد شدہ کرنسی کی وضاحت نہ کر سکے۔
ایف آئی اے نے مقدمہ درج کرکے مزید تفتیش شروع کر دی ہے جبکہ دیگر ساتھیوں کی گرفتاری کے لیے چھاپے جاری ہیں
