کراچی کے علاقے ناگن چورنگی کے قریب نامعلوم موٹر سائیکل سوار ملزمان نے دکان پر اندھا دھند فائرنگ کر کے دو افراد کو موت کے گھاٹ اتار دیا۔
پولیس کے مطابق فائرنگ کا واقعہ صدیق اکبر مسجد باب عارف کے قریب واقع جائے نماز کی دکان پر پیش آیا، جہاں دو مسلح افراد نے اچانک فائرنگ شروع کردی۔ فائرنگ کے نتیجے میں 30 سالہ مولانا شاہ احمد اور 30 سالہ ابوبکر موقع پر جاں بحق ہوگئے۔
اطلاع ملنے پر پولیس اور ریسکیو ٹیمیں موقع پر پہنچ گئیں اور لاشوں کو قریبی اسپتال منتقل کیا گیا۔ کرائم سین یونٹ نے جائے وقوعہ سے 9 ایم ایم پستول کے 8 خول برآمد کر کے فرانزک تجزیے کے لیے لیب بھجوا دیے۔
ایس ایس پی ضلع وسطی سید وقار علی کے مطابق دونوں حملہ آور ایک موٹر سائیکل پر سوار تھے اور فائرنگ کے بعد فرار ہونے میں کامیاب ہوگئے۔
پولیس کے مطابق جاں بحق ہونے والا مولانا شاہ احمد گلگت کا رہائشی اور دکان کا مالک تھا، جبکہ ابوبکر کراچی کا مقامی شہری اور دکان پر کام کرتا تھا۔ دونوں افراد نارتھ ناظم آباد بلاک ایل عرفات ٹاؤن میں مقیم تھے۔
ابتدائی طور پر پولیس نے شبہ ظاہر کیا ہے کہ واقعہ فرقہ وارانہ دشمنی یا ذاتی عناد کا نتیجہ ہو سکتا ہے۔ تحقیقات جاری ہیں اور ملزمان کی تلاش کے لیے کارروائی تیز کر دی گئی ہے۔
