کراچی – نارتھ کراچی ناگن چورنگی صدیق اکبر مسجد کے قریب دکان پر فائرنگ سے دو افراد کے قتل کا مقدمہ مقتول کے بھائی کی مدعیت میں درج کرلیا گیا، مقدمے میں قتل اور دہشت گردی کی دفعات شامل کی گئی ہیں۔
پولیس کے مطابق نامعلوم موٹرسائیکل سوار ملزمان نے زم زم کیپ اینڈ خوشبو ہاؤس نامی دکان پر فائرنگ کی، جس کے نتیجے میں 32 سالہ شاہ احمد پیرزادہ اور 24 سالہ ابوبکر شدید زخمی ہوئے۔ دونوں کو تشویشناک حالت میں عباسی شہید اسپتال منتقل کیا گیا، جہاں وہ دورانِ علاج دم توڑ گئے۔
پولیس نے جائے وقوعہ سے 9 ایم ایم پستول کے پانچ خول اور سی سی ٹی وی فوٹیج حاصل کرلی۔ فوٹیج میں ایک حملہ آور کو دکان کے اندر داخل ہوکر فائرنگ کرتے جبکہ دوسرا موٹرسائیکل پر بیٹھا نظر آیا۔ ایس ایس پی سینٹرل ذیشان شفیق صدیقی کے مطابق مقدمہ الزام نمبر 680/2025، دفعہ 302، 34 اور 7 اے ٹی اے کے تحت درج کیا گیا ہے۔
پولیس نے واقعے کو ٹارگٹ کلنگ قرار دیتے ہوئے مختلف پہلوؤں سے تفتیش شروع کردی ہے۔ مقتولین کا تعلق اہلسنت والجماعت (ASWJ) سے بتایا جا رہا ہے، جب کہ سی ٹی ڈی ٹیم بھی تفتیش میں شامل کر لی گئی ہے تاکہ واقعے کے پسِ منظر اور ممکنہ روابط کا جائزہ لیا جا سکے۔
اہلسنت والجماعت کے رہنماؤں نے واقعے کی شدید مذمت کرتے ہوئے حکومت اور قانون نافذ کرنے والے اداروں سے مطالبہ کیا کہ ملزمان کو جلد از جلد گرفتار کر کے انصاف فراہم کیا جائے۔ ان کا کہنا تھا کہ جماعت کے کارکنان کو مسلسل نشانہ بنایا جا رہا ہے اور حکومت شہریوں کے جان و مال کے تحفظ میں ناکام نظر آ رہی ہے۔
