صوبائی مشیر برائے ویمن ڈویلپمنٹ ڈاکٹر ربابہ خان بلیدی نے سول سنڈیمن پروونشل ہسپتال کوئٹہ اور بولان میڈیکل کمپلیکس ہسپتال میں اقوام متحدہ کے ادارہ برائے خواتین کے تعاون سے بلوچستان کے پہلے اینٹی ریپ کرائسز سیلز کا افتتاح کیا۔
اس موقع پر ڈاکٹر ربابہ خان بلیدی نے کہا کہ اینٹی ریپ کرائسز سیلز کا قیام صوبے میں خواتین اور بچوں کے تحفظ کی سمت ایک انقلابی قدم ہے۔ یہ سیلز متاثرین کو فوری اور جامع امداد فراہم کرنے کے لیے جدید طرز پر قائم کیے گئے ہیں۔
ڈاکٹر بلیدی نے مزید کہا کہ یہ اقدام وزیراعلیٰ بلوچستان میر سرفراز بگٹی کی ہدایت کے مطابق ویمن ڈویلپمنٹ ڈیپارٹمنٹ کے وژن کا حصہ ہے، جس کا مقصد صنفی بنیاد پر تشدد کا خاتمہ اور متاثرین کو فوری انصاف کی فراہمی کو یقینی بنانا ہے۔
انہوں نے بتایا کہ یہ سیلز بلوچستان کی تاریخ میں اپنی نوعیت کا پہلا مربوط نظام ہیں جہاں طبی امداد، نفسیاتی مشاورت، قانونی معاونت، اور پولیس سپورٹ سب ایک ہی چھت تلے فراہم کی جائیں گی۔ اس نظام سے نہ صرف متاثرین کو بروقت مدد ملے گی بلکہ ایسے کیسز کے قانونی عمل کو بھی تیز اور مؤثر بنایا جا سکے گا۔
ڈاکٹر ربابہ بلیدی نے کہا کہ صوبائی حکومت خواتین کو بااختیار بنانے اور ان کے تحفظ کے لیے عملی اقدامات پر یقین رکھتی ہے۔ انہوں نے اقوام متحدہ کے ادارہ برائے خواتین (یو این ویمن) کا خصوصی شکریہ ادا کیا جنہوں نے اس منصوبے کی کامیابی کے لیے تکنیکی اور انتظامی معاونت فراہم کی۔
صوبائی مشیر نے اپنے عزم کا اظہار کیا کہ آئندہ بلوچستان کے دیگر اضلاع میں بھی ایسے مراکز قائم کیے جائیں گے تاکہ صوبے کے ہر حصے میں خواتین اور بچوں کو بروقت مدد اور انصاف کی فراہمی ممکن ہو سکے۔
