کراچی: وفاقی تحقیقاتی ایجنسی (ایف آئی اے) نے دو مختلف کارروائیوں کے دوران حوالہ ہنڈی اور غیر قانونی کرنسی ایکسچینج کے کاروبار میں ملوث چار ملزمان کو گرفتار کرلیا۔
ترجمان ایف آئی اے کے مطابق اینٹی کرپشن سرکل اور اسٹیٹ بینک سرکل کراچی نے نیو چالی اور کینٹ اسٹیشن کے علاقوں میں کارروائی کرتے ہوئے چار ملزمان مصطفی، شکیل، امداد علی اور کاشف غوری کو گرفتار کیا۔
کارروائی کے دوران ملزم شکیل اور مصطفی کے قبضے سے مجموعی طور پر 60 لاکھ روپے برآمد ہوئے، جبکہ امداد علی اور کاشف غوری کے قبضے سے 15 ہزار سعودی ریال، 4 ہزار 970 یو اے ای درہم، 2 کروڑ 20 لاکھ ایرانی ریال، 400 امریکی ڈالر، 96 عمانی ریال، 160 تھائی بھات، ایک لاکھ ازبک سوم، 49 ہزار 500 عراقی دینار، 15 چائنیز یوآن، 93 ملائیشین رنگٹ اور 8 لاکھ روپے پاکستانی کرنسی بھی برآمد ہوئے۔
ایف آئی اے کے مطابق گرفتار ملزمان بغیر لائسنس کرنسی ایکسچینج کا کاروبار کر رہے تھے۔ ملزمان کے قبضے سے موبائل فونز، حوالہ ہنڈی اور غیر قانونی لین دین سے متعلق ڈیجیٹل شواہد بھی حاصل کر لیے گئے ہیں۔
پولیس حکام کے مطابق ملزمان برآمد ہونے والی ملکی و غیر ملکی کرنسی کے بارے میں کوئی تسلی بخش وضاحت پیش نہ کر سکے۔ مزید تحقیقات جاری ہیں جبکہ نیٹ ورک کے دیگر ساتھیوں کی گرفتاری کے لیے چھاپے مارے جا رہے ہیں۔
