راولپنڈی: ایئرپورٹس سیکیورٹی فورس (اے ایس ایف) نے اسلام آباد انٹرنیشنل ایئرپورٹ پر بروقت کارروائی کرتے ہوئے منشیات اسمگلنگ کی بڑی کوشش ناکام بنا دی۔
ترجمان اے ایس ایف کے مطابق دبئی جانے والے ایک مسافر کے سامان سے 1.706 کلو گرام کرسٹل آئس ہیروئن اور 216 گرام نشہ آور گولیاں برآمد ہوئیں۔
فورس کے مطابق ملزم نے منشیات آٹا گوندھنے والی مشین کے خفیہ خانوں میں چھپا رکھی تھیں۔ جب سامان کی تلاشی کے دوران مشین کو کھولا گیا تو اندر سے بھاری مقدار میں منشیات برآمد ہوئیں۔
ترجمان نے کہا کہ یہ کارروائی اے ایس ایف اہلکاروں کی مستعدی، پیشہ ورانہ مہارت اور بروقت حکمتِ عملی کا واضح ثبوت ہے۔
ابتدائی تفتیش کے بعد گرفتار مسافر کو برآمد شدہ منشیات سمیت مزید قانونی کارروائی کے لیے اینٹی نارکوٹکس فورس (اے این ایف) کے حوالے کر دیا گیا۔
