اسلام آباد — نیشنل سائبر کرائم انویسٹی گیشن ایجنسی نے وزیراعلیٰ خیبرپختونخوا محمد سہیل آفریدی کے خلاف سائبر کرائم قوانین کے تحت مقدمہ درج کرلیا ہے، جس میں الزام عائد کیا گیا ہے کہ انہوں نے جھوٹے اور گمراہ کن بیانات کے ذریعے ریاستی اداروں کی ساکھ کو نقصان پہنچایا۔
ذرائع کے مطابق یہ مقدمہ سائبر کرائم رپورٹنگ سینٹر اسلام آباد میں ایک شہری کی شکایت پر درج کیا گیا۔ ایف آئی آر میں کہا گیا ہے کہ وزیراعلیٰ خیبرپختونخوا نے سوشل میڈیا پر ایسی ویڈیوز شیئر کیں جن میں ریاستی اور قومی سلامتی کے اداروں کے خلاف بے بنیاد اور اشتعال انگیز بیانات دیے گئے۔
مقدمے کے متن میں مزید کہا گیا ہے کہ یہ ویڈیوز عوامی جذبات کو بھڑکانے اور ریاستی اداروں پر عوامی اعتماد کو کمزور کرنے کے لیے پھیلائی گئیں۔
ایف آئی آر میں یہ بھی درج ہے کہ وزیراعلیٰ نے اڈیالہ جیل کے باہر میڈیا سے گفتگو کے دوران ریاستی اداروں کے خلاف گمراہ کن بیانات دیے، جنہیں بعد ازاں پی ٹی آئی کے آفیشل سوشل میڈیا پیجز سے بھی شیئر کیا گیا۔
تحقیقات کا آغاز کردیا گیا ہے تاکہ اس مواد کے پھیلاؤ اور اثرات کا جائزہ لیا جاسکے۔
