قلعہ سیف اللہ: قلعہ سیف اللہ کی ضلعی انتظامیہ نے منشیات کے خلاف کارروائی کے سلسلے میں بڑی پیش رفت کرتے ہوئے بھنگ کی کاشت میں ملوث زمینداروں کی فہرست تیار کرلی ہے۔
انتظامیہ کے مطابق ملزمان کے نام باقاعدہ طور پر محکمہ داخلہ کو ارسال کر دیے گئے ہیں۔ ڈپٹی کمشنر ساگر کمار کا کہنا ہے کہ بھنگ کی کاشت میں ملوث افراد کو فورتھ شیڈول میں شامل کرنے کی سفارش بھی کر دی گئی ہے، جس سے ان کی سخت نگرانی اور قانونی کارروائی ممکن ہو سکے گی۔
انہوں نے کہا کہ نوجوان نسل کو منشیات کے تباہ کن اثرات سے بچانے کے لیے انتظامیہ مؤثر اور عملی اقدامات اٹھا رہی ہے۔ ساگر کمار نے عوام سے اپیل کی کہ وہ اپنے علاقوں میں مشکوک سرگرمیوں کی نشاندہی کریں تاکہ منشیات اور دیگر جرائم کے خلاف ضلعی انتظامیہ کی زیرو ٹالرنس پالیسی مزید مضبوط ہو سکے۔
ڈپٹی کمشنر نے واضح کیا کہ قلعہ سیف اللہ کو پرامن اور محفوظ ضلع بنانے کے لیے انتظامیہ پُرعزم ہے اور قانون شکن عناصر کے خلاف بلاامتیاز کارروائیاں مسلسل جاری رہیں گی۔
