کراچی: ایف آئی اے امیگریشن نے کراچی ائرپورٹ پر کارروائی کرتے ہوئے جعلی دستاویزات پر ویزا حاصل کرنے والے مسافر کو آف لوڈ کر دیا۔
تفصیلات کے مطابق ملزم محمد آصف سعودی عرب جانے کے لیے بین الاقوامی پرواز پر سوار ہونے والا تھا، جب کہ اس کے پاسپورٹ پر ہیوی ٹرک ڈرائیور کی ملازمت کے لیے ویزا موجود تھا۔
دورانِ تصدیق ملزم کی جانب سے لائسنس برانچ کلفٹن کا جاری کردہ ایچ ٹی وی لائسنس پیش کیا گیا، جو جانچ پڑتال میں جعلی ثابت ہوا۔ ملزم کا تعلق کراچی سے ہے۔
ابتدائی تفتیش میں ملزم نے اعتراف کیا کہ اس نے یہ جعلی لائسنس ایک ایجنٹ سے 1 لاکھ 27 ہزار روپے میں بنوایا اور وہ کبھی بھی لائسنس برانچ کلفٹن گیا ہی نہیں۔
ایف آئی اے نے ملزم کو مزید پوچھ گچھ اور ایجنٹ کی نشاندہی کے لیے اینٹی ہیومن ٹریفکنگ سرکل کراچی کے حوالے کر دیا ہے، جہاں تفتیش جاری ہے۔
