کراچی: یوٹیوبر اور انفلوئنسر ازلان شاہ کو اس وقت سخت تنقید کا سامنا کرنا پڑا جب ان کی جانب سے انسٹاگرام اسٹوری پر شیئر کیے گئے ایک مبہم پیغام میں دعویٰ کیا گیا کہ وہ “دوبارہ شادی کرنے جا رہے ہیں۔” اس اعلان نے فوراً ہی سوشل میڈیا پر ہلچل مچا دی اور مداحوں میں بے چینی، غصہ اور بحث کا ماحول پیدا ہوگیا۔
ازلان نے اپنی اسٹوری میں کہا کہ وہ ایک "اہم بات” خود بتانا چاہتے ہیں تاکہ افواہیں نہ پھیلیں۔ اس مبہم جملے کے بعد کئی صارفین نے اسے مذاق سمجھا، کچھ نے خبر کو سچ مان لیا، جبکہ متعدد لوگ شدید ناراضی کا اظہار کرتے نظر آئے۔
کچھ گھنٹوں بعد ازلان نے اپنی اہلیہ ڈاکٹر وریشہ جاوید خان کے ہمراہ ایک ویڈیو جاری کی، جس میں وضاحت کی گئی کہ یہ اعلان صرف ایک پرینک تھا، جس کا مقصد اپنی شادی کی سالگرہ پر ’واؤ رینیول‘ کا اشارہ دینا تھا۔ انہوں نے تسلیم کیا کہ ابتدائی اعلان کے بعد لوگوں نے انہیں جھوٹا کہا اور یہاں تک کہ گالیاں بھی دیں۔
ویڈیو میں وریشہ نے اس پرینک کے انداز پر برہمی کا اظہار کرتے ہوئے اسے غیر مناسب قرار دیا، جبکہ ازلان بار بار معافی مانگتے رہے اور اپنی محبت کا اظہار کرتے رہے۔ وریشہ نے یہ بھی کہا کہ وہ انہیں کبھی دوسری شادی کے بارے میں سوچنے بھی نہیں دیں گی، جس پر ازلان نے دوبارہ معذرت کی۔
تاہم، ان وضاحتوں کے باوجود سوشل میڈیا صارفین مطمئن نہ ہوئے۔ متعدد صارفین نے اس پرینک کو غیر حساس اور غیر ضروری قرار دیتے ہوئے کہا کہ "دوسری شادی کے مذاق” جیسے ٹرینڈز معاشرتی رویوں کو مزید نقصان پہنچاتے ہیں۔ کچھ نے سوال اٹھایا کہ کیا اب توجہ اور ویوز حاصل کرنا اخلاقیات سے زیادہ اہم ہوچکا ہے؟
دیگر صارفین نے کھل کر ازلان کو تنقید کا نشانہ بنایا اور کہا کہ یہ سب ’سستی شہرت‘ کے لیے کیا گیا۔ کچھ نے مذاق میں مشورہ دیا کہ وہ فوری طور پر اپنے تبصرے بند کردیں تاکہ صورتحال مزید خراب نہ ہو۔
ازلان اور وریشہ، جن کی شادی 2022 میں ہوئی اور جن کی ایک دو سالہ بیٹی ہے، عموماً اپنی ہلکی پھلکی مزاحیہ ویڈیوز کے باعث پسند کیے جاتے ہیں، لیکن اس بار ان کا مذاق ناظرین کو بالکل پسند نہ آیا اور الٹا ان کے خلاف شدید ردِعمل کا سبب بن گیا۔
