لاہور— شاہدرہ ٹاؤن کی ایک 15 سالہ لڑکی کو بابا فرید کالونی میں اس وقت اذیت ناک صورتحال کا سامنا کرنا پڑا جب اس کے بھائی نے غیرت کے نام پر اس کے بال مونڈ دیے اور نازیبا ویڈیوز بنا کر اسے وائرل کرنے کی دھمکیاں دیں۔
پولیس کے مطابق لڑکی اپنے بھائی کے گھر آئی ہوئی تھی، جہاں ملزمان نے اس پر نام نہاد غیرت کے نام پر تشدد اور تذلیل کی۔ متاثرہ لڑکی کے والد دلبر کی درخواست پر ایس ایچ او کوٹ لکھپت نے مقدمہ درج کر کے کارروائی کی اور فرید کالونی سے چار ملزمان کو گرفتار کر لیا۔
گرفتار کیے گئے افراد میں لڑکی کا بھائی، بھابھی اور دو دیگر رشتے دار شامل ہیں۔
اے ایس پی کشمالہ فاروق کے مطابق ملزمان کو لڑکی کی کسی سے دوستی کا شک تھا، جس کی بنیاد پر انہوں نے زبردستی اس کے بال مونڈ دیے اور نازیبا ویڈیوز بنا کر اسے بلیک میل کرتے رہے۔
پولیس کے مطابق گرفتار ملزمان میں بھائی قاسم، بھابھی معصومہ، سمیر اور گنگر بی بی شامل ہیں۔ مزید تفتیش جاری ہے۔
