کراچی: پاکستان کوسٹ گارڈز نے گزشتہ ایک ماہ کے دوران ایرانی ڈیزل کی اسمگلنگ کے خلاف بڑے آپریشنز کرتے ہوئے مجموعی طور پر 17 لاکھ 64 ہزار 615 لیٹر غیر قانونی ڈیزل برآمد کر لیا ہے۔
کوسٹ گارڈز کے ترجمان کے مطابق یہ کارروائیاں انٹیلی جنس کی بنیاد پر بلوچستان کے مختلف علاقوں گوادر، پسنی اور اوتھل میں روڈ چیک پوسٹوں اور سمندری راستوں کے ذریعے کی گئی ہیں۔
ترجمان نے بتایا کہ زمینی راستے سے 17 لاکھ 46 ہزار 615 لیٹر جبکہ سمندری راستے سے 18 ہزار لیٹر غیر قانونی ڈیزل ضبط کیا گیا، جو بلوچستان سے کراچی اسمگل کیا جا رہا تھا۔ کارروائی کے دوران ڈیزل سے بھرے ٹرک اور آئل ٹینکرز بھی قبضے میں لے لیے گئے ہیں اور مزید تحقیقات شروع کر دی گئی ہیں۔
ضبط شدہ ڈیزل اور گاڑیوں کی مجموعی مالیت تقریباً 487.03 ملین روپے بتائی گئی ہے۔ ترجمان نے کہا کہ پاکستان کوسٹ گارڈز ہر قسم کی اسمگلنگ کے خلاف سرگرم عمل ہے اور ملکی معیشت کے استحکام کے لیے اپنا کردار جاری رکھے گی۔
