فیصل آباد — فیصل آباد میں بچوں سے زیادتی کے متعدد مقدمات میں ملوث ملزم ریاض عرف راجو کو، پولیس مقابلے کے دوران فرار ہونے کے فوری بعد زخمی حالت میں دوبارہ گرفتار کر لیا گیا ہے۔ تاہم، ملزم کو چھڑانے والے اس کے مسلح ساتھی فرار ہونے میں کامیاب ہو گئے۔ یہ واقعہ تھانہ بلوچنی کی حدود میں پیش آیا۔
حکام کے مطابق، اسسٹنٹ سب انسپکٹر جاوید انور اپنے دیگر ملازمان کے ہمراہ زیر حراست ملزم ریاض عرف راجو کو اسلحہ برآمدگی کے لیے لے جا رہے تھے۔ 90 سیم پل کے قریب پہنچتے ہی دو موٹر سائیکلوں پر سوار چار نامعلوم مسلح ملزمان نے پولیس پارٹی پر فائرنگ کر دی اور ملزم کو چھین کر فرار ہونے کی کوشش کی۔
واقعے کی اطلاع ملتے ہی ایس ایچ او تھانہ بلوچنی اور پولیس کی بھاری نفری فوری طور پر جائے وقوعہ پر پہنچ گئی۔ اس دوران ملزمان اور پولیس پارٹی کے درمیان مقابلہ شروع ہو گیا۔ پولیس نے اپنے تحفظ خود اختیاری کے تحت جوابی فائرنگ کی۔
فائرنگ تھمنے پر چیکنگ کی گئی تو ملزم ریاض عرف راجو زخمی حالت میں زمین پر پڑا ملا۔ حکام نے تصدیق کی کہ ملزم اپنے ہی ساتھیوں کی فائرنگ سے زخمی ہوا تھا۔ اس کے ساتھی ملزمان تاریکی کا فائدہ اٹھاتے ہوئے فرار ہونے میں کامیاب ہو گئے۔ زخمی ملزم کو فوری طور پر علاج کے لیے اسپتال منتقل کر دیا گیا ہے۔
فرار ہونے والے ملزمان کی گرفتاری کے لیے شہر بھر میں ناکہ بندی کر کے تلاش کا عمل شروع کر دیا گیا ہے۔
ملزم ریاض عرف راجو گن پوائنٹ پر چھوٹے بچوں اور بچیوں کو ڈرا دھمکا کر زیادتی کا نشانہ بناتا تھا۔ وہ تھانہ بلوچنی کی حدود میں پانچ بچوں سے زیادتی کے مقدمات میں ریکارڈ یافتہ ہے۔
