کراچی: مچھر کالونی کے علاقے میں واقع ایک گھر میں والد نے مبینہ طور پر فائرنگ کر کے اپنی بیٹی اور داماد کو قتل کر دیا۔
ریسکیو حکام کے مطابق زخمی خاتون کو سول اسپتال کراچی منتقل کیا گیا، جہاں وہ دورانِ علاج زخموں کی تاب نہ لاتے ہوئے دم توڑ گئی۔
پولیس کا کہنا ہے کہ فائرنگ مقتولہ زینب کے والد نے کی، جو واقعے کے بعد فرار ہو گیا۔ مقتولہ نے عتیق نامی نوجوان سے اپنی مرضی سے شادی کی تھی اور پشاور سے کراچی منتقل ہو گئی تھی۔
تحقیقات کے مطابق ملزم اپنی بیٹی سے مسلسل رابطے میں تھا اور واقعے سے تین روز قبل بیٹی اور داماد کے گھر آیا تھا۔ پولیس کے مطابق واردات کے وقت دونوں میاں بیوی سو رہے تھے کہ ملزم نے فائرنگ کی اور موقع سے فرار ہو گیا۔
پولیس نے مزید تحقیقات شروع کر دی ہیں اور ملزم کی گرفتاری کے لیے چھاپے مارے جا رہے ہیں۔
