راولپنڈی کے تھانہ روات کی حدود میں واقع چک بیلی خان روڈ بانیان کے علاقے میں پراسرار فائرنگ کے نتیجے میں دو ماہ کی نوبیاہتا خاتون جاں بحق جبکہ اس کا شوہر زخمی ہو گیا۔
راولپنڈی پولیس کے مطابق شہری سلیمان نے اطلاع دی کہ محمد ریحان اپنی 21 سالہ اہلیہ طیبہ بی بی کے ہمراہ موٹر سائیکل پر دوائی لینے گیا تھا، تاہم واپسی میں غیر معمولی تاخیر ہوئی۔ تلاش کے دوران ان کی موٹر سائیکل سڑک پر پڑی ہوئی ملی۔
پولیس کا کہنا ہے کہ موٹر سائیکل کے قریب طیبہ بی بی کی لاش جبکہ کچھ فاصلے پر محمد ریحان زخمی حالت میں ملا، جس نے بیان دیا کہ شکیل اور اس کے ساتھیوں نے فائرنگ کر کے اس کی اہلیہ کو قتل اور اسے زخمی کر دیا۔
اطلاع ملنے پر ایس ایچ او روات انسپکٹر زاہد ظہور پولیس ٹیم کے ہمراہ جائے وقوع پر پہنچے، شواہد اکٹھے کیے، لاش کو پوسٹ مارٹم کے لیے جبکہ زخمی کو علاج کی غرض سے اسپتال منتقل کر دیا گیا۔
پولیس کے مطابق ابتدائی تفتیش میں انکشاف ہوا ہے کہ مقتولہ اور زخمی کی شادی دو ماہ قبل ہوئی تھی، جبکہ یہ بات بھی سامنے آئی ہے کہ شادی سے قبل مقتولہ کا رشتہ کہیں اور طے پایا تھا۔
جائے وقوع سے ملنے والے شواہد کے مطابق موٹر سائیکل میں دو گولیاں لگی ہوئی تھیں، مقتولہ کو سر میں گولی مار کر قتل کیا گیا، جبکہ زخمی ریحان کے سر پر چوٹ کے نشانات پائے گئے۔
پولیس حکام کا کہنا ہے کہ واقعے کی تمام پہلوؤں سے تفتیش جاری ہے اور ملوث ملزمان کو گرفتار کر کے قانون کے کٹہرے میں لایا جائے گا۔
