لاہور: چلتی ٹرین میں خاتون مسافر کو مبینہ طور پر تھپڑ مارنے کے واقعے پر پاکستان ریلوے نے کارروائی کرتے ہوئے اسپیشل ٹکٹ ایگزامینر ارشاد کو معطل کر دیا ہے، جبکہ واقعے کی باقاعدہ انکوائری بھی شروع کر دی گئی ہے۔
ڈویژنل کمرشل آفیسر عبداللہ ارشد کے مطابق ابتدائی کارروائی کے بعد انکوائری کا عمل شروع کیا گیا ہے تاکہ واقعے کے تمام پہلوؤں کا جائزہ لیا جا سکے۔
ریلوے ذرائع کے مطابق واقعہ فیصل آباد سے راولپنڈی جانے والی پاکستان ایکسپریس ٹرین میں پیش آیا، جہاں کوچ کے اندر سامان رکھنے کے معاملے پر مسافروں کے درمیان تلخ کلامی شروع ہوئی۔ ویڈیوز بنائے جانے کے بعد معاملہ شدت اختیار کر گیا اور ہاتھا پائی تک نوبت پہنچ گئی۔
ذرائع کا کہنا ہے کہ جھگڑے کے دوران ٹرین کچھ دیر کے لیے رکی رہی، تاہم دیگر مسافروں کی مداخلت سے صورتحال پر قابو پا لیا گیا۔
ریلوے حکام کے مطابق مسافروں کی شکایات موصول ہونے کے بعد فوری کارروائی عمل میں لائی گئی ہے۔ پیر کے روز انکوائری کمیٹی کے سامنے معطل ٹکٹ ایگزامینر، ڈیوٹی پر موجود پولیس اہلکار اور ٹرین گارڈ پیش ہوں گے۔
حکام کے مطابق یہ واقعہ چار سے پانچ روز قبل پیش آیا تھا۔
