راولپنڈی/لاہور – 9 مئی:
جمعہ کی رات راولپنڈی اور لاہور میں زور دار دھماکوں کی آوازیں سنی گئیں، جس کے بعد قانون نافذ کرنے والے ادارے اور ریسکیو ٹیمیں فوری طور پر متحرک ہو گئیں۔
ابتدائی اطلاعات کے مطابق راولپنڈی میں دو دھماکوں کی آوازیں سنائی گئیں، جن میں سے ایک چکلالہ کے قریب نور خان ایئربیس کے نزدیک سنی گئی۔ پولیس نے فوری طور پر علاقے کو گھیرے میں لے لیا، جبکہ ریسکیو ٹیمیں بھی موقع پر پہنچ گئیں۔
سیکیورٹی ذرائع کا دعویٰ ہے کہ نور خان ایئربیس کے قریب مبینہ بھارتی حملے کو ناکام بنا دیا گیا ہے۔ تاہم، ابھی تک آئی ایس پی آر یا وزارت دفاع کی جانب سے کوئی باضابطہ تصدیق سامنے نہیں آئی۔
دوسری جانب، لاہور میں بھی متعدد دھماکوں کی آوازیں سنی گئی ہیں۔ ان دھماکوں کی نوعیت اور درست مقام کے بارے میں تحقیقات جاری ہیں اور حکام اس بات کا جائزہ لے رہے ہیں کہ آیا دونوں واقعات آپس میں جڑے ہوئے ہیں یا نہیں۔
مزید معلومات سرکاری ذرائع کی جانب سے تصدیق کے بعد فراہم کی جائیں گی۔
