سکیورٹی امور کی معروف امریکی ماہر اور تجزیہ کار ڈاکٹر کرسٹین فیئر نے ایک بار پھر پاکستان کے مؤقف کی حمایت کرتے ہوئے بھارت کو آڑے ہاتھوں لیا ہے۔ ایک حالیہ ٹی وی پروگرام میں گفتگو کے دوران انہوں نے کہا کہ جس طرح بھارتی یہ سمجھتے ہیں کہ کشمیر میں ہونے والی ہر کارروائی کے پیچھے پاکستان کا ہاتھ ہے، اسی طرح پاکستانی بھی اس بات پر یقین رکھتے ہیں کہ بلوچستان میں ہونے والی دہشتگردی میں بھارت ملوث ہے۔
کرسٹین فیئر نے کہا کہ بھارتی عوام اس حقیقت کو تسلیم کرنے کے لیے تیار نہیں ہوتے اور نہ ہی اس پر گفتگو کرنا چاہتے ہیں کہ بعض اوقات بھارت اپنی حدیں پار کر جاتا ہے۔
انہوں نے مزید کہا کہ بھارتی صحافی اویناش پالیوال نے بھی اپنی کتاب "My Enemy’s Enemy” میں بلوچستان میں بھارت کی مداخلت کے ثبوت پیش کیے ہیں۔
یاد رہے کہ کرسٹین فیئر اس سے قبل بھی پاکستان کے خلاف بھارتی دعووں کو جھوٹا قرار دے چکی ہیں۔ انہوں نے بھارتی ائیرفورس کے اس دعوے کو "بکواس” کہا تھا جس میں کہا گیا تھا کہ بھارتی فضائیہ نے پاکستان کے کئی طیارے گرائے۔
