کراچی کے علاقے بلال کالونی میں سینٹرل پولیس نے اہم کارروائی کرتے ہوئے خطرناک اور انتہائی مطلوب ڈکیت گروہ کو مقابلے کے بعد زخمی حالت میں گرفتار کر لیا۔ ایس ایس پی سینٹرل کے مطابق گرفتار ملزمان کا تعلق فہاد چپٹا گینگ سے ہے، جو 100 سے زائد سنگین وارداتوں میں ملوث رہا ہے۔
ایس ایس پی سینٹرل نے بتایا کہ گرفتار ملزمان کی شناخت فہاد عرف چپٹا اور شان عرف شانی کے ناموں سے ہوئی ہے، جبکہ گروہ کا سرغنہ اور اس کا قریبی ساتھی بھی پولیس کی حراست میں ہیں۔ گینگ میں 8 سے زائد افراد شامل ہیں، جو ڈسٹرکٹ سینٹرل میں عرصہ دراز سے خوف کی علامت بنے ہوئے تھے۔
کارروائی کے دوران ملزمان کے قبضے سے اسلحہ، چھینے گئے موبائل فون، موٹر سائیکل اور نقدی بھی برآمد کی گئی۔ پولیس کے مطابق یہ گروہ اقدام قتل، ڈکیتی، اسٹریٹ کرائم، گھروں اور دکانوں میں چوری، موٹر سائیکل چھیننے جیسی درجنوں وارداتوں میں ملوث ہے۔ گرفتار ملزمان دوران واردات شہریوں پر فائرنگ کرنے کے واقعات میں بھی پیش پیش رہے ہیں۔
گزشتہ روز بھی ملزمان نے ایک راہ گیر سے موٹر سائیکل چھیننے کی واردات کی، جس کی سی سی ٹی وی فوٹیج بھی پولیس نے حاصل کر لی ہے۔ گروہ شہریوں سے اسلحے کے زور پر لاکھوں روپے مالیت کے قیمتی موبائل فونز اور دیگر قیمتی اشیاء چھیننے میں ملوث رہا ہے۔
ملزمان کے خلاف بلال کالونی، خواجہ اجمیر، نیو کراچی، انڈسٹریل ایریا، سرجانی اور تیموریہ تھانوں میں متعدد مقدمات درج ہیں۔ پولیس کا کہنا ہے کہ گروہ کے دیگر مفرور ملزمان کی تلاش کے لیے چھاپے مارے جا رہے ہیں جبکہ گرفتار افراد سے مزید تفتیش جاری ہے۔
