کراچی کے شہریوں کو شدید گرمی کے بعد آج کچھ راحت میسر آنے والی ہے، کیونکہ محکمہ موسمیات نے شہر کے مختلف علاقوں میں گرج چمک اور تیز ہواؤں کے ساتھ موسلا دھار بارش کی پیش گوئی کی ہے۔
شہر کے مختلف علاقوں، خاص طور پر مضافاتی اور بیرونی علاقوں میں آج شام اور رات کے وقت کہیں ہلکی تو کہیں تیز بارش متوقع ہے۔
بارش کے ساتھ ساتھ شمال مغرب سے جھکڑ چلنے کا امکان ہے طوفانی بادلوں کے ساتھ
دن کے وقت درجہ حرارت 36 سے 38 ڈگری سینٹی گریڈ تک جا سکتا ہے، جبکہ صبح کے وقت ہوا میں نمی کا تناسب 70 سے 80 فیصد کے درمیان ہے جو شام تک کم ہو کر تقریباً 55 فیصد ہو جائے گا۔
محکمہ موسمیات کا کہنا ہے کہ یہ تبدیلی ایک مغربی ہوائی نظام اور مشرقی سندھ میں نمی لانے والی ہواؤں کے امتزاج کی وجہ سے ہو رہی ہے، جس سے شدید گرم اور خشک موسم میں وقفہ آئے گا۔
آج اور کل کراچی اور گرد و نواح میں گرد آلود آندھیوں اور بعض مقامات پر ژالہ باری کا خدشہ بھی ظاہر کیا گیا ہے۔ اس کے علاوہ سندھ، پنجاب، خیبر پختونخوا اور بلوچستان کے مختلف علاقوں میں 16 جون تک پری مون سون بارشوں کا امکان ہے۔
