پیر کے روز حیدرآباد پریس کلب پر مختلف افراد نے اپنے مطالبات کے حق میں الگ الگ مظاہرے کیے۔
سندھ پولیس میں بھرتی کے لیے امتحان دینے والے حیدرآباد کے نوجوانوں نے حیدرآباد پریس کلب پر احتجاجی مظاہرہ کیا۔
ملک شہباز اور دیگر کا کہنا تھا کہ وہ میرٹ پر مکمل طور پر پورا اترے تھے، مگر انتظامیہ اپنے پسندیدہ افراد کو نوکریاں دے رہی ہے یا پھر پیسوں کے عوض نوکریاں بیچی جا رہی ہیں، ہمیں صرف جھوٹی تسلی دی جارہی ہے۔
ان کا کہنا تھا کہ انہیں حیدرآباد میں بھرتی کے لیے منتخب کیا گیا ہے اور وہ تمام ٹیسٹ پاس کر چکے ہیں، لیکن متعلقہ حکام نے ان کی اسناد پر غور نہیں کیا۔ ان کا کہنا تھا کہ میرٹ کا قتل کیا جا رہا ہے جس کے باعث وہ شدید پریشان ہیں، لیکن ان کی بات کسی جگہ پر نہیں سنی جا رہی۔ انہوں نے مطالبہ کیا کہ انہیں ان کا حق دیا جائے۔
