اسلام آباد: اینٹی نارکوٹکس فورس (اے این ایف) نے ایک نائجیرین خاتون کو گرفتار کرلیا جو راولپنڈی اور اسلام آباد میں طلبہ کو کوکین فراہم کرنے میں ملوث تھی۔
ترجمان اے این ایف کے مطابق ملزمہ واسیلاٹ اموسا عرف علابہ کو وفاقی دارالحکومت کے سیکٹر ایچ-13 میں ایک فلیٹ پر چھاپے کے دوران گرفتار کیا گیا۔ کارروائی میں 180 گرام کوکین اور ملزمہ کا نائجیریا کے شہر لاگوس سے جاری شدہ پاسپورٹ برآمد ہوا۔
تحقیقات میں انکشاف ہوا ہے کہ خاتون مقامی تعلیمی ادارے کے طلبہ کو منشیات سپلائی کرتی تھی۔ حکام کے مطابق حالیہ کارروائیوں کے دوران دیگر نائجیرین منشیات فروشوں کو بھی گرفتار کیا جا چکا ہے۔
ملزمہ کے خلاف مقدمہ درج کرلیا گیا ہے اور مزید تحقیقات جاری ہیں۔
