کراچی – ٹی سی ایف اسکول کے قریب واقع ایک گھر میں فائرنگ کے واقعے میں 35 سالہ سندس زوجہ عمران عرف دانیال جاں بحق ہوگئیں۔ لاش کو چھیپا ایمبولینس کے ذریعے عباسی شہید اسپتال منتقل کیا گیا۔
ترجمان کراچی پولیس کے مطابق، ابتدائی تحقیقات سے معلوم ہوتا ہے کہ واقعہ ذاتی دشمنی کا شاخسانہ ہے۔
واقعے کے بعد مقتولہ کی بہن سحر نے ایک ویڈیو بیان جاری کیا، جس میں بتایا گیا کہ اس نے اپنے شوہر شارق سے خلع لے رکھی تھی۔ سحر کے مطابق، شارق اپنے بھائی علی، عارف اور بہن کے ہمراہ والدہ کے گھر آیا اور زبردستی اس کی چھوٹی بیٹی کو ساتھ لے جانے کی کوشش کی۔
اسی دوران شارق کے بھائی عارف نے فائرنگ کر دی، جس کی زد میں آکر سندس جاں بحق ہوگئیں۔
ملزمان فائرنگ کے بعد موقع سے فرار ہوگئے۔ پولیس نے مقدمہ درج کر کے ملزمان کی گرفتاری کے لیے چھاپے مارنے کا سلسلہ شروع کر دیا ہے۔
