10 ستمبر 2025
ویب ڈیسک
کراچی میں بدھ کے روز شدید بارشوں کے بعد تھڈو ڈیم اپنی گنجائش سے تجاوز کر گیا جس کے نتیجے میں ملیر اور لیاری ندیاں بپھر گئیں۔ پانی قریبی آبادیوں میں داخل ہوگیا اور کئی رہائشی علاقے مکمل طور پر زیرِ آب آ گئے۔
اسکیم 33، جمالی پل اور ایم نائن موٹروے کے اطراف سب سے زیادہ متاثرہ مقامات ہیں۔ سندھ حکومت کے مطابق تھڈو ڈیم کا پانی ایم نائن سے ٹکرا گیا جس کے بعد موٹروے کے بیچ کی دیوار توڑنے کا فیصلہ کیا گیا تاکہ پانی کو قدرتی بہاؤ دیا جا سکے۔
ریسکیو حکام کے مطابق کئی خاندان گھروں میں محصور ہیں اور بعض مقامات پر پانی کئی فٹ تک جمع ہو گیا ہے۔ کشتیوں کے ذریعے لوگوں کو محفوظ مقامات پر منتقل کیا جا رہا ہے۔ گلشن اقبال کے قریب لیاری ندی میں پھنسے دو افراد کو بحفاظت نکال لیا گیا۔
کمشنر کراچی نے آج شہر بھر کے اسکول بند رکھنے کا اعلان کر دیا ہے تاکہ طلبہ اور والدین کسی ممکنہ خطرے سے بچ سکیں۔
