کراچی / حیدرآباد – فیڈرل انویسٹی گیشن ایجنسی (ایف آئی اے) نے سندھ بھر میں حوالہ ہنڈی اور غیر قانونی کرنسی ایکسچینج کے خلاف کارروائیاں تیز کر دی ہیں۔
ڈی جی ایف آئی اے کی ہدایت پر کارپوریٹ کرائم اور کمرشل بینکنگ سرکل کراچی نے کارروائی کرتے ہوئے دو ملزمان اقبال اور سلمان کو نکل روڈ اور پی ای سی ایچ ایس سے گرفتار کیا۔ ملزمان کے قبضے سے 88 لاکھ روپے نقد، 2 ہزار 155 امریکی ڈالر، 5 ہزار 835 اماراتی درہم، سعودی ریال، مختلف مالیت کے پرائز بانڈ اور موبائل فون برآمد ہوئے۔ ترجمان کے مطابق ملزمان برآمد شدہ کرنسی کے حوالے سے کوئی تسلی بخش وضاحت پیش نہ کر سکے، جس پر ان سے مزید تفتیش جاری ہے جبکہ دیگر ساتھیوں کی گرفتاری کے لیے چھاپے مارے جا رہے ہیں۔
دوسری کارروائی میں ایف آئی اے کمپوزٹ سرکل لاڑکانہ نے قمبر سٹی سے دو ملزمان احسن علی اور ندیم کو گرفتار کیا، جن کے قبضے سے 2 لاکھ 25 ہزار روپے، پانچ موبائل فون اور دیگر شواہد برآمد کیے گئے۔ ملزمان کرنسی کے حوالے سے حکام کو مطمئن نہ کر سکے۔ ایف آئی اے کے مطابق ملزمان سے تفتیش جاری ہے اور ان کے نیٹ ورک میں شامل دیگر افراد کی گرفتاری کے لیے چھاپے مارے جا رہے ہیں۔
