لاہور — وزیراعلیٰ پنجاب مریم نواز شریف نے کہا ہے کہ صوبے کے کئی اضلاع میں جرائم کی شرح صفر ہو چکی ہے، جو پولیس کی بہتر کارکردگی اور کرائم کنٹرول ڈپارٹمنٹ (سی سی ڈی) کی کاوشوں کا نتیجہ ہے۔
لاہور میں پنجاب انفورسمنٹ اینڈ ریگولیٹری اتھارٹی (پیرا) کی پاسنگ آؤٹ پریڈ سے خطاب کرتے ہوئے وزیراعلیٰ نے کہا کہ، "جہاں کبھی روزانہ 100 جرائم رپورٹ ہوتے تھے، اب کئی کئی دن گزر جاتے ہیں اور کوئی کیس سامنے نہیں آتا۔ لوگ کہتے ہیں کہ وہ اب سکون کے ساتھ گھر سے نکل سکتے ہیں۔”
انہوں نے خواتین کے تحفظ کو اپنی ترجیح قرار دیتے ہوئے کہا کہ خواتین کے خلاف جرائم برداشت نہیں کیے جائیں گے، اور ایسے عناصر کو سخت انجام بھگتنا ہوگا۔ مریم نواز نے مزید کہا کہ صوبائی حکومت زمینوں پر قبضہ کرنے والوں کے خلاف نیا قانون لارہی ہے، جس کے تحت 90 دن میں فیصلے ہوں گے اور 10 سال تک قید کی سزا دی جا سکے گی۔
وزیراعلیٰ نے نئی بھرتی ہونے والے افسران کو مخاطب کرتے ہوئے رشوت سے پاک سروس کا عزم کرنے پر زور دیا۔ ان کا کہنا تھا کہ، "رشوت کی کمائی میں برکت نہیں، محنت کی کمائی چاہے کم ہو، اللہ اس میں برکت ڈالتا ہے۔”
مریم نواز نے پیرا کے قیام کو گڈ گورننس کی مثال قرار دیتے ہوئے بتایا کہ اس ادارے نے عوام کو ناجائز تجاوزات اور ذخیرہ اندوزی جیسے مسائل سے نجات دلانے میں اہم کردار ادا کیا ہے۔ ان کے مطابق، گندم اور آٹے کی قیمتوں کو بھی پیرا اور محکمہ خوراک نے مؤثر اقدامات سے کنٹرول کیا۔
وزیراعلیٰ نے مزید کہا کہ سیلاب کے دوران پیرا کے جوانوں نے عوام کے انخلا اور ریلیف میں اہم کردار ادا کیا اور یہ اس بات کا ثبوت ہے کہ پنجاب حکومت عوامی خدمت کے جذبے کے ساتھ کھڑی ہے۔
