کراچی — پاکستان کی معروف اور خوبرو اداکارہ مایا علی نے اپنی سالگرہ کو یادگار بنانے پر اپنے قریبی دوستوں، فیملی اور مداحوں کا دل سے شکریہ ادا کیا ہے۔ انہوں نے اپنے آفیشل انسٹاگرام ہینڈل پر اپنی سالگرہ کی تقریبات کی دلکش تصاویر اور ویڈیوز پر مبنی ایک تفصیلی البم (کیروسل) شیئر کیا۔ زندگی کے ایک اور سال مکمل ہونے پر شکر گزاری کا اظہار کرتے ہوئے مایا علی نے لکھا کہ وہ خود کو بے حد خوش قسمت محسوس کرتی ہیں اور اللہ کا شکر ادا کرتی ہیں۔ انہوں نے مزید لکھا کہ عمر بڑھنے کے ساتھ ساتھ انہیں اس بات کا احساس ہو رہا ہے کہ زندگی میں مثبت سوچ، دیکھ بھال اور آپ سے سچی محبت کرنے والے لوگ ہی سب سے زیادہ اہمیت رکھتے ہیں۔
اداکارہ نے اپنی پوسٹ کے آخر میں مزاحیہ انداز میں مداحوں کو یہ بھی کہا کہ وہ فی الحال صبر سے کام لیں کیونکہ ابھی سالگرہ کی مزید تصاویر آنا باقی ہیں۔ مایا علی کی اس پوسٹ پر شوبز انڈسٹری کے ساتھی اداکاروں اور مداحوں کی جانب سے مبارکباد اور محبت بھرے پیغامات کا تانتا بندھ گیا۔ معروف اداکارہ حرا مانی نے کمنٹ کرتے ہوئے لکھا "ہیپی برتھ ڈے پیاری انسان”، جبکہ ہاجرہ یامین نے بھی انہیں سالگرہ کی مبارکباد دیتے ہوئے "ہیپی برتھ ڈے ٹو یو، بیوٹی فل” لکھا۔ واضح رہے کہ مایا علی نے 2021 میں اے آر وائی ڈیجیٹل کے مشہور رومانوی ڈرامے ‘پہلی سی محبت’ میں مرکزی کردار ادا کیا تھا اور وہ اپنی بہترین اداکاری کے باعث مداحوں کے دلوں پر راج کرتی ہیں۔
