ستمبر 14، 2025
ویب ڈیسک
وزیراعظم شہباز شریف نے سیلاب سے متاثرہ علاقوں کے عوام کو بڑا ریلیف دیتے ہوئے اگست کے بجلی بل معاف کرنے کا اعلان کیا ہے۔ انہوں نے پاور ڈسٹری بیوشن کمپنیوں کو فوری طور پر ہدایت دی ہے کہ سیلاب زدہ علاقوں میں بلوں کی وصولی بند کر دی جائے۔
وزیراعظم کی زیرِ صدارت بجلی بلوں سے متعلق اجلاس میں فیصلہ کیا گیا کہ جن صارفین نے اگست کا بل پہلے ہی ادا کر دیا ہے، ان کے لیے اگلے ماہ کے بلوں میں ایڈجسٹمنٹ کی جائے گی۔
شہباز شریف نے کہا کہ سیلاب نے لاکھوں خاندانوں کو متاثر کیا ہے اور حکومت ہر ممکن ریلیف فراہم کرنے کے لیے پرعزم ہے۔ ان کا کہنا تھا کہ بجلی بلوں کے حوالے سے ایک جامع ریلیف پیکیج بین الاقوامی مالیاتی فنڈ (آئی ایم ایف) کے ساتھ مذاکرات مکمل ہونے کے بعد سامنے لایا جائے گا۔
وزیراعظم نے واضح کیا کہ وفاقی اور صوبائی ادارے مل کر بحالی اور امدادی کام جاری رکھیں گے تاکہ متاثرہ خاندان جلد از جلد اپنے گھروں کو لوٹ سکیں۔ انہوں نے عزم ظاہر کرتے ہوئے کہا:
"ہم اس وقت تک آرام سے نہیں بیٹھیں گے جب تک سیلاب زدگان کو دوبارہ آباد نہیں کر دیا جاتا۔”
