راولپنڈی: تحصیل گوجرخان کے علاقے میں غیرت کے نام پر والد نے مبینہ طور پر فائرنگ کر کے اپنی بیٹی اور اس کے مبینہ آشنا کو قتل کر دیا۔
پولیس کے مطابق واقعہ تکیہ بابا رحیم شاہ کے علاقے میں پیش آیا، جہاں ملزم نے گھر کے اندر مبینہ طور پر بیٹی کو ایک نوجوان کے ساتھ دیکھنے پر طیش میں آکر فائرنگ کر دی، جس کے نتیجے میں دونوں افراد موقع پر ہی دم توڑ گئے۔
مقتولین کی شناخت شنائل اور رحمان اللہ کے نام سے ہوئی ہے۔ فائرنگ کے دوران ملزم کی اہلیہ بھی نشانہ بنیں اور تین گولیاں لگنے سے شدید زخمی ہو گئیں، جنہیں فوری طور پر اسپتال منتقل کر دیا گیا۔
واقعے کی اطلاع ملتے ہی اے ایس پی گوجرخان دانیال کاظمی اور ایس ایچ او گوجرخان طیب ظہیر موقع پر پہنچے۔ پولیس نے جائے وقوع سے شواہد اکٹھے کیے، لاشوں کو قانونی کارروائی کے لیے اسپتال منتقل کیا اور تفتیش کا آغاز کر دیا۔
پولیس کا کہنا ہے کہ ملزم نے واردات کے بعد خود کو قانون کے حوالے کر دیا ہے، جبکہ مزید تحقیقات جاری ہیں۔
