لاہور/وہاڑی: جمعہ کے روز لاہور کے فیکٹری ایریا میں پولیس مقابلے کے دوران دو ڈاکو مارے گئے جبکہ وہاڑی اور عارفوالا میں الگ الگ کارروائیوں میں مزید آٹھ ڈاکو ہلاک ہوئے.
لاہور میں ڈیفنس پولیس اسٹیشن کے کرائم کنٹرول ڈپارٹمنٹ (CCD) کی ٹیم ملزمان مون اور حفیظ کو ریکوری کے لیے لے جا رہی تھی کہ ان کے ساتھیوں نے والٹن روڈ کے قریب پولیس پر فائرنگ کر دی۔ جوابی کارروائی کے دوران دونوں ملزمان اپنے ہی ساتھیوں کی گولیوں کا نشانہ بن کر ہلاک ہوگئے۔ لاشوں کو بعد ازاں جنرل اسپتال کے مردہ خانے منتقل کر دیا گیا۔
وہاڑی کے گاؤں 423-EB کے قریب ایک اور مقابلے میں ایک ڈاکو مارا گیا جبکہ پولیس اہلکار علی امام زخمی ہوگیا، جسے تحصیل ہیڈکوارٹر اسپتال بوریوالہ منتقل کیا گیا۔ پولیس نے فرار ہونے والے ملزمان کی گرفتاری کے لیے سرچ آپریشن شروع کر دیا۔
اسی دوران وہاڑی میں پھکی واس گینگ کے چار خطرناک ڈاکو پولیس مقابلے میں مارے گئے۔ یہ گینگ قتل، اقدامِ قتل اور ڈکیتی سمیت متعدد سنگین وارداتوں میں ملوث تھا۔ پولیس کے مطابق خفیہ اطلاع پر چھاپہ مارا گیا تو ڈاکوؤں نے اندھا دھند فائرنگ شروع کر دی جس کے جواب میں چاروں مارے گئے۔
عارفوالا میں بھی پولیس نے چار ڈاکوؤں کو مقابلے کے دوران ہلاک کر دیا، یوں 24 گھنٹوں کے دوران وہاڑی اور عارفوالا میں پولیس مقابلوں میں مارے جانے والے ڈاکوؤں کی تعداد آٹھ ہو گئی۔
