کراچی — بلدیہ ٹاؤن میں افسوسناک واقعہ پیش آیا جہاں سپر اسٹور کے ملازم کو صرف اس بات پر پولیس اہلکاروں نے سر عام تشدد کا نشانہ بنا ڈالا کہ اس نے انہیں غلط جگہ موٹر سائیکل پارک کرنے سے منع کیا۔
تفصیلات کے مطابق واقعہ تھانہ سعید آباد کی حدود میں پیش آیا۔ پولیس اہلکار ذیشان نے غصے میں آکر سات سے آٹھ دیگر پولیس اہلکاروں کے ساتھ واپس آکر اسٹور ملازم کو سڑک پر گھسیٹا اور بے دردی سے مارا پیٹا۔
واقعے کی ویڈیو سوشل میڈیا پر وائرل ہونے کے بعد شہریوں کی جانب سے شدید غم و غصے کا اظہار کیا گیا۔ ایس ایس پی کیماڑی فیضان علی نے بتایا کہ کسی پولیس اہلکار کو شہریوں سے بدتمیزی یا مارپیٹ کی اجازت نہیں، اور اس واقعے میں ملوث چار اہلکاروں — ہیڈ کانسٹیبل عامر، کانسٹیبل معاذ، کانسٹیبل جواد، اور کانسٹیبل تنویر — کو کوارٹر گارڈ کر کے ان کے خلاف محکمانہ کارروائی شروع کر دی گئی ہے۔
