لاہور: ایف آئی اے اینٹی کرپشن سرکل لاہور نے کارروائی کرتے ہوئے جعلی ایف آئی اے اہلکار بن کر سرکاری دفاتر سے رقم بٹورنے والے منظم گروہ کے دو کارندوں کو گرفتار کرلیا۔
ترجمان ایف آئی اے کے مطابق گرفتار ملزمان کی شناخت عمر طارق اور فہد عرفان کے نام سے ہوئی۔ دونوں ملزمان خود کو ایف آئی اے اہلکار ظاہر کرکے مختلف سرکاری دفاتر سے رقوم بٹورتے تھے۔
ایف آئی اے حکام کے مطابق کارروائی علامہ اقبال ٹاؤن کے علاقے میں کی گئی، جہاں سے ملزمان کے قبضے سے درخواست گزار سے حاصل کی گئی رقم اور اہم ڈیجیٹل شواہد برآمد کرلیے گئے۔
ترجمان نے مزید بتایا کہ گروہ کے سرغنہ اور دیگر مفرور ملزمان کی گرفتاری کے لیے چھاپے مار کارروائیاں جاری ہیں۔
