35ویں نیشنل گیمز کے ریسلنگ مقابلوں کے نتائج جاری کر دیے گئے، جہاں کامن ویلتھ گیمز کے گولڈ میڈلسٹ انعام بٹ نے ایک بار پھر اپنی بہترین کارکردگی دکھاتے ہوئے گولڈ میڈل اپنے نام کیا۔
انعام بٹ مجموعی طور پر 18 مرتبہ نیشنل چیمپئن بننے والے ریسلر بن گئے ہیں۔ اس مقابلے میں پاکستان آرمی کے نعمان ذکاء نے سلور میڈل حاصل کیا جبکہ پنجاب کے رانا فیضان اور ریلوے کے حیدر علی نے برانز میڈل جیتا۔
57 کلوگرام کیٹیگری میں واپڈا کے جنید خان نے سونے کا تمغہ جیتا، پنجاب کے فراز خان نے چاندی اور آرمی کے صابر علی نے کانسی کا تمغہ حاصل کیا۔
70 کلوگرام میں پنجاب کے عبداللہ نے گولڈ میڈل اپنے نام کیا جبکہ 79 کلوگرام کیٹیگری میں آرمی کے اسد اللہ فاتح ٹھہرے۔
ریسلنگ ایونٹ کے پہلے دن واپڈا نے 2 جبکہ آرمی اور پنجاب نے 1، 1 گولڈ میڈل حاصل کیا۔
فٹ بال ایونٹ میں پاکستان آرمی، نیوی اور ایئر فورس کی ٹیمیں سیمی فائنل میں پہنچ گئی ہیں۔ سیمی فائنل 10 دسمبر جبکہ فائنل 12 دسمبر کو ہوگا۔
کے پی ٹی اسٹیڈیم میں نیوی اور سندھ کا میچ 1-1 سے برابر رہا۔ نیوی کی جانب سے نعمان اور سندھ کی طرف سے وسیم نے گول اسکور کیا۔
خواتین کے سوئمنگ ایونٹس کے پہلے روز پاکستان آرمی کی تیراندازوں نے شاندار کارکردگی دکھاتے ہوئے 5 گولڈ میڈلز جیت کر سبقت حاصل کر لی، جبکہ سندھ نے 1 گولڈ اپنے نام کیا۔
کے ایم سی اسپورٹس کمپلیکس میں ہونے والے ان مقابلوں میں آرمی کی جہان آراء نبی اور بسمہ خان نے دو، دو گولڈ میڈلز حاصل کیے۔
میڈل ٹیبل میں پاکستان آرمی 5 گولڈ اور 1 برانز کے ساتھ پہلے نمبر پر رہی، جبکہ سندھ 1 گولڈ اور 3 سلور میڈلز کے ساتھ دوسرے نمبر پر رہا۔
